مستخدمين كتير بدؤوا يستعملوا تطبيق تيلجرام لما انتشر رفع المسلسلات والافلام عليه وزاد عدد المستخدمين بشكل أكبر بعد مشاكل خصوصية الواتساب ومشاركة بيانات المستخدمين مع الفيسبوك.
1. الرسائل المجدولة
والتطبيق حاز على رضا المستخدمين بسبب سهولة الاستخدام و كثرة المميزات اللي بتفرقه عن باقي التطبيقات على رأسها الواتساب. ومع ذلك فيه مميزات كتير مخفية معظم المستخدمين ميعرفوش عنها حاجة، فهنذكر بشكل سريع بعض المميزات دي.
1. الرسائل المجدولة
تطبيق التليجرام بيسمح انك تجدول الرسالة بحيث انها توصل في وقت معين كأنك بتظبط منبه. عشان تبعت رسالة مجدولة، اكتب الرسالة اللي عاوزها توصل لكن لما تيجي تبعتها خليك ضاغط على علامة الارسال لحد لما تظهرلك نافذة اختار منها رسالة مجدولة، ثم حدد الوقت اللي عاوز الرسالة توصل فيه.
2.الرسائل الصامتة
الميزة دي بتخلي الرسالة اللي بتبعتها توصل ولكن الاشعار بيوصل للشخص بدون صوت بحيث انك لو عاوز تبعت رسالة لحد من غير ما تزعجه عشان لو نايم مثلا او في شغل او اجتماع.
الطريقة زي الرسالة المجدولة بالظبط لكن بتختار “رسالة صامتة”
3.الصور ذاتية التدمير
وتعتبر من افضل مميزات التليجرام، وبتقدر من خلالها تبعت صورة بتتمسح لوحدها بعد ما المستقبل يشوفها وميقدرش يحتفظ بيها.
الطريقة كانك بتبعت صورة عادية، اضغط على الصورة ودور على علامة ساعة تحت الصورة ، اضغط عليها وحدد الوقت اللي الرسالة تتسمح بعده. ويتميز التليجرام انه بيمنع ان المستقبل ياخد سكرين شوت بعكس تطبيق سيجنال.
4.مجلدات الرسائل
حيث ان تطبيق التليجرام عليه قنوات في مختلف المجالات و مش محصور على المحادثات الشخصية فهتلاقي التطبيق مزحوم جدا وممكن يوصلك رسايل شخصية ومتاخدش بالك ودا كان بيحصل معايا شخصيا لحد لما نزلت ميزة فولدرات الرسايل واللي بتسمحلك تقسم الرسايل عندك لمجموعات على حسب راحتك عشان توفرلك الوقت والمجهود والاحراج لما توصلك رسالة ومتاخدش بالك منها غير بعد ايام.
افتح اعدادات التطبيق واختار المجلدات ، هتلاقي مجلدين جاهزين , unread ,personal
المجلد الشخصي هيظهر فيه كل الرسايل اللي جاية من جهات الاتصال، والمجلد التاني هيظهر فيه كل الرسايل الغير مقروؤة.
تقدر تعمل مجلدات تانية سواء للشغل أو المسلسلات او الدراسة.
5.مساحة تخزين شخصي غير محدودة
تقدر تستخدم التليجرام في تخزين كميات كبيرة جدا من الملفات بدون ما تدفع ولا مليم واحد.
بكل بساطة افتح الشريط الجانبي واضغط على الرسائل المحفوظة وارفع اي فيديو او صورة او اي ملف عاوز تحفظه على السحابة الخاصة بيك على تطبيق التليجرام.
6.الأشخاص القريبون
الميزة دي بتسمحلك تشوف مستخدمين التيلجرام القريبين منك و دا بيسهلك انك تبعت ملف او رسالة لحد قريب منك بدون ما تضطر تاخد رقمه وتسجله والحوار الطويل دا، فلو عاوز تبعت حاجة لحد تعرفه قريب منك بسرعة فالميزة دي هتختصر عليك الوقت.
افتح الشريط الجانبي واضغط على الأشخاص القريبون وشغل الموقع هيظهرلك المستخدمين القريبين منك.
7.تعديل الصور بعد ارسالها
لو في مرة بعتت صورة بالغلط بدل صورة تانية او حتى لو عاوز تقص جزء من صورة انت بعتتها لحد فمش لازم تمسحها وتبعتها من الاول تاني.
تقدر بكل بساطة تفضل ضاغط عليها وتضغط على تعديل ، فتستبدل الصورة او تعدلها زي ما انت عاوز
8.تعديل الواجهة
تطبيق تيلجرام بيتيحلك اختيارات كتير في تعديل المظهر عشان يناسب ذوقك.
افتح القائمة الجانبية وادخل الى الاعدادات ثم الى اعدادات المحادثات، هتلاقي مظاهر متعددة نهاري وليلي ومظلم وتقليدي وغيرها والوان مختلفة كتير.
9.مشاركة الموقع الحي (لايف)
بتقدر من خلال الميزة دي تبعت الموقع بتاعك لحد من صحابك قريب منك بحيث يراقب حركتك باستمرار ويكون اسهل عليكوا تقابلوا بعض لو تايه مثلا، ويتميز تيلجرام بانه فيه خاصية انكوا لو انتوا الاتنين مشاركين الموقع تقدر تشغل خاصية “الاشعار عند الاقتراب” بحيث ينبهك انكوا بقيتوا قريبين من بعض.
10.استخدم اكتر من رقم تليفون
تقدر تسجل دخول على تطبيق تليجرام باكتر من رقم تليفون، فلو عندك رقم شخصي ورقم للشغل فمش هتقابلك اي مشاكل في استخدام الحسابين في نفس الوقت.
وبرده لو حبيت تنقل كل المحادثات والبيانات الخاصة بيك من رقم تليفون لرقم تاني فكل اللي عليك تفتح القائمة الجانبية وادخل الاعدادات واضغط على رقم التليفون واضغط تغيير الرقم وتابع التعليمات.
بعد لما تخلص الخطوات هتلاقي كل البيانات بقت متسجلة على الحساب و جهات الاتصال هيظهر عندها الرقم الجديد.
تعليقات
إرسال تعليق
يهمنا رأيك , أكتب تعليقك هنا ❤️